«Մոսկուա» կինօթատրանին մէջ Մարտ 5-ին տեղի ունեցաւ «Ժխտման Ճարտարապետները» (“Architects of denial”) ֆիլմի անդրանիկ ցուցադրութիւնը: «Սուփըրման»-ի ֆիլմաշարի հեռատեսիլային տարբերակի գլխաւոր դերակատար Տին Քէյն եւ արտադրող Մոնթել Ուիլեըմս հայ հանդիսատեսին ներկայացուցին Հայոց Ցեղասպանութեան նուիրուած վաւերագրական ֆիլմը: Անիկա նուիրուած է Թուրքիոյ, Ատրպէյճանի եւ Միացեալ Նահանգներու այն քաղաքական գործիչներուն, որոնք կը փորձեն խոչընդոտել Հայոց Ցեղասպանութեան ճանաչումը:
Ֆիլմին համաշխարհային անդրանիկ ցուցադրութիւնը նախատեսուած է արդէն Հոկտեմբերին, իսկ մինչ այդ ֆիլմը Ամերիկայի Հայ դատի յանձնախումբի աջակցութեամբ ցուցադրուած էր Ուաշինկթընի մէջ` քաղաքական գործիչներու, փորձագէտներու եւ հայ համայնքի համար:
Ֆիլմին մէջ փաստավաւերագրական նիւթեր են` իրենց յուշերը կը պատմեն Մեծ Եղեռնը վերապրածները, Սումգայիթի, Պաքուի ջարդերէն փրկուածները, առաջադէմ փորձագէտներն ու քաղաքական գործիչները: Ծանր տեսարանները կը զուգակցուին աղմկայարոյց բացայայտումներով:
Ֆիլմի երեւանեան ցուցադրութեան ներկայ գտնուած են նաեւ ՀՀ նախագահ Սերժ Սարգսեան եւ տիկին Ռիտա Սարգսեան:
