Թիֆլիսի 19-րդ դարուն կառուցուած Թանդոյեանց Ս. Աստուածածին եկեղեցւոյ գործով Թիֆլիսի քաղաքային դատարանին մէջ նշանակուած առաջին դատական նիստը յետաձգուած է: Այս մասին «Թերթ»-ի հետ զրոյցի մը ընթացքին ըսած է Վիրահայոց թեմի իրաւական հարցերով պատասխանատու Միքայէլ Աւագեան:
Վիրահայոց թեմը կը նշէ, որ կեղծ փաստաթուղթի հիման վրայ եկեղեցին փոխանցուած է վրաց պատրիարքարանին, եւ թեմը դիմած է դատարան` եկեղեցին կա՛մ իրեն վերադարձնելու, կա՛մ ալ դարձեալ իբրեւ պետութեան սեփականութիւն տնտեսութեան նախարարութեան վերադարձնելու պահանջով:
«Թանդոյեան եկեղեցին այժմ կը նկատուի Վրաց պատրիարքարանի սեփականութիւնը, սակայն ատիկա որեւէ իրաւական հիմք չունի:
«Թանդոյեանց եկեղեցին կառուցուած է իբրեւ հայ առաքելական եկեղեցի, գործած է իբրեւ հայ առաքելական եկեղեցի, խոնարհուած է իբրեւ հայ առաքելական եկեղեցի:
«Այդ եկեղեցին հայկական է, սակայն 2017 թուականի յուլիսին Վրաստանի կառավարութիւնը վրաց պատրիարքարանին փոխանցած է 19-րդ դարուն կառուցուած Թիֆլիսի Թանդոյեանց Ս. Աստուածածին եկեղեցին: Մենք Թիֆլիսի քաղաքային դատարանէն կը պահանջենք, որ ջնջուի Վրաստանի պետական արձանագրութեան` եկեղեցին վրաց պատրիարքարանին յանձնելու որոշումը», ըսած է Աւագեան` աւելցնելով, որ եկեղեցին հայկական է, եւ պիտի վերադարձուի իր նախկին կարգավիճակին:
Նշեալ եկեղեցին կառուցուած է 1883 թուականին:
