Հայկական զինուած ուժերը արդէն համալրուած են ռուսական արտադրութեան «Քորնեթ» հակահրասայլային հրթիռային համալիրներով: Այս մասին հաղորդեց ՀՀ ՊՆ «Զինուժ» հեռուստածրագրի Փետրուար 17-ի թողարկումը:
«Քորնեթ»-ով համալրուած զօրամասերէն մէկու զօրաբաժնի հրամանատար Արթուր Վարդանեան յայտնած է, որ անձնակազմը ձեռք բերած է համապատասխան գիտելիքներ համալիրը կիրառելու վերաբերեալ:
Ռուսաստանեան նորագոյն արտադրութեան հակահրասայլային հրթիռային համալիրով կրակի վարման առաւելագոյն հեռահարութիւնը ցերեկը` 5500 մ. է, իսկ գիշերը` 3500 մ. : Նուազագոյն հեռահարութիւնը` 100 մ. է, թիրախի առաւելագոյն ճակատային արագութիւնը` 70 քմ. /ժ: Կառավարման համակարգը` կիսաաինքնաշխատ է, լազերային ճառագայթով: Հրթիռի տրամաչափը կը կազմէ 152 մմ. , զանգուածը` 26 քկ. , մարտական մասը` 7քկ․:
2015-ին Հայաստանն ու Ռուսիան կնքեցին վարկային պայմանագիր, որու համաձայն Մոսկուան պէտք է $200 միլիոն վարկ տրամադրէ` սպառազինութեան ձեռքբերման համար: Պայմանագրի ծիրէն ներս, ի թիւս այլ զինատեսակներու, նախատեսուած էր նաեւ «Քորնեթ»ներու ձեռքբերումը:
