Կիրակի` 26 Նոյեմբեր 2017-ի առաւօտեան, ՀԲԸՄ-ՀԵԸ-ի Կեդրոնական Վարչութեան հովանաւորութեամբ, ՀԵԸ-ի 32 վարչութիւններ ներկայացնող աւելի քան երկու հարիւր յիսուն վարչականներու մասնակցութեամբ, ՀԲԸՄ-ի Տեմիրճեան կեդրոնին մէջ տեղի ունեցաւ ՀԲԸՄ-ՀԵԸ-ի տարեկան վարչական ընդհանուր ժողովը:
Լիբանանի, Հայաստանի, ՀԲԸՄ-ի եւ ՀԵԸ-ի քայլերգներու յոտնկայս ունկընդրութենէն ետք, ՀԵԸ-ի Կեդրոնական Վարչութեան ատենապետ Վիգէն Չերչեան բարի գալուստ մաղթեց ներկաներուն, ի մասնաւորի ՝ ՀԲԸՄ-ի Լիբանանի Շրջանակային Յանձնաժողովի ատենադպիր տիկին Սիլվա Լիպարիտեանին. « Իւրաքանչիւր տարի կը համախմբուինք այս սրահին մէջ հաշուեյարդարի եւ հաշուետուութեան: Արդար հպարտութեամբ կ’արձանագրենք, որ շնորհիւ բոլորիդ հաւաքական աշխատանքին եւ մասնակցութեան, անցնող տասն եւ երկու ամիսներուն կանգուն եւ կենսունակ մնացին մեր 86-ամեայ Միութեան կառոյցները: Կը հաւատանք, որ այսօր, վաղը եւ ապագային, հաւաքական նոյն վճռակամութեամբ եւ յանձնառութեամբ պիտի շարունակէք Ձեր առաքելութիւնը» շեշտեց ՀԵԸ-ի Կեդրոնական Վարչութեան ատենապետը, մէկ առ մէկ գնահատելով սկաուտական, մարզական, մշակութային, երիտասարդական միաւորներուն զոհողութեամբ եւ նուիրումով աշխատանքը:
Վիգէն Չերչեան շնորհակալութեան յատուկ խօսք ուղղեց ՀԲԸՄ-ի Լիբանանի Շրջանակային Յանձնաժողովին եւ անոր ատենապետ տիար Ժերար Թիւֆենքճեանին` ՀԵԸ-ի միջոցառումներուն մնայուն կերպով նեցուկ կենալու անմնացորդ պատրաստակամութեան: Ան, շնորհակալութեան խօսք յղեց նաեւ ՀԵԸ-ի Կեդրոնական Վարչութեան անդամներուն եւ ՀԵԸ-ի գրասենեակին:
Ժողովը ծափահարութիւններով դիմաւորեց ՀԲԸՄ-ՀԵԸ-ի ֆութպոլի նոր մարզադաշտին շինարարութեան աւետիսը, երախտագիտութեամբ արձանագրելով ՀԲԸՄ-ի Լիբանանի Շրջանակային Յանձնաժողովին եւ ՀԵԸ-ի Կեդրոնական վարչութեան հետեւողական ջանքերը, բազում զոհողութիւնները, իրականացած տեսնելու տարիներու երազ մը:
Այս նպատակով, մեծ պաստառի վրայ հերթականութեամբ ցուցադրուեցան ֆութպոլի մարզադաշտին շինարարութիւնը եւ ՀԵԸ-ի Կեդրոնական Վարչութեան նախաձեռնութեամբ կազմակերպուած՝Art For A Cause նկարչական ցուցահանդէսը նկարագրող տեսաերիզներ:
Գնահատանքով արձանագրուեցան, Art For A Cause նկարչական ցուցահանդէսի յաջողութեան ի սպաս, Կեդրոնական Վարչութեան անդամ՝ Կերի Ֆեթէլի, ինչպէս նաեւ ֆութպոլի մարզադաշտին շինարարական աշխատանքներուն, Կեդրոնական Վարչութեան գանձապահ՝ Վաչէ Մելքոնեանի անմիջական հետապնդումները:
Ընդհանուր վարչական ժողովի առաջին բաժնին մէջ, խօսք առին ՀԲԸՄ-ՀԵԸ-ի բոլոր վարչութիւններուն ներկայացուցիչները: Անոնք ամփոփ տողերու մէջ զեկուցեցին անցնող տարուան իրենց գործունէութիւնը: Գրաւոր խօսքերուն զուգահեռ, մեծ պաստառի վրայ կը ցուցադրուէին վարչութիւններուն աշխատանքը խտացնող տեսաերիզներ:
Կարճ դադարէ եւ յիշատակի խմբանկարէն ետք, ընդհանուր վարչական ժողովը շարունակեց իր աշխատանքը, քննարկելուվ 2018 տարեշրջանի համար նախատեսուած ծրագիրները, անոնց պիւտճէական գնահատումները: Այս միջոցին տեղի ունեցաւ մտքերու փոխանակում: Առաջարկութիւնները արձանագրուեցան, հետագայի համար, առ ի քննարկում:
Ընդհանուր վարչական ժողովը եզրափակուեցաւ ՀԵԸ-ի Կեդրոնական Վարչութեան ատենապետին ՝ հաւաքական ճիգերով աշխատանքը շարունակելու բարեմաղթութիւններով:
ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ
