Երուսաղէմը Իսրայէլի մայրաքաղաք ճանաչելու եւ, նոյնհետայն, իր երկրի դեսպանատունը այնտեղ փոխադրելու Մ. Նահանգների նախագահի որոշումը, ինչպէսեւ սպասւում էր, ծայրայեղ լարուածութեան մատնեց ողջ տարածաշրջանը, որն արդէն վերջին տասնամեակում գտնւում է անօրինակ խռովայոյզ վիճակում եւ դարձել է արիւնալի բախումների, քանդումների ու բռնագաղթերի թատերաբեմ: Տոնալտ Թրամփի այդ որոշումը այժմ սպառնում է նոր արիւնայեղութիւններ, նոր տառապանքներ բերել տարածաշրջանի ազգաբնակչութիւններին, որոնցից զերծ չեն մնալու նաեւ Միջին Արեւելքի հայագաղութները:
Մեր կարծիքով, սպառնալիք է կախուած նաեւ Հայկական Երուսաղէմի գլխին, ոչ միայն տեղի՝ արդէն նոսրացած մեր գաղթօճախի, այլ մանաւանդ՝ Հայոց պատրիարքութեան, Սուրբ քաղաքում նրա դարաւոր ներկայութեան, նրա նիւթական ու հոգեւոր անգնահատելի հարստութիւնների գլխին: Նախագահ Թրամփի որոշումը, դրան հետեւելիք իսրայէլական իշխանութիւնների «կարգադրութիւնները» սպառնում են խախտել փխրուն հաւասարակշռութիւնը, որ գոյութիւն ունի Հին Երուսաղէմի միջկրօնական եւ ազգամիջեան համագոյակեցութեան ասպարէզում, խախտելու է դարաւոր կարգավիճակները, որոնցից տուժելու է Ս. Յակոբեայ վանքը, մեր միւս սրբատեղիները:
Այստեղ աւելորդ ենք համարում վերստին յիշեցնել Հայկական Երուսաղէմի դիրքի կարեւորութիւնը քրիստոնէական երեք մեծ եկեղեցիների մէջ: Կարեւոր եւ, հետեւաբար, առաւել խոցելի՝ նաեւ իր թոյլ պաշտպանուածութեամբ: Ուստի՝ առաւել ենթակայ արտաքին ոտնձգութիւնների, իրաւունքների ոտնահարման:
Նկատի ունենալով այս եւ այլ հանգամանքները, Ռամկավար Ազատական Կուսակցութեան Կենտրոնական վարչութիւնը առաջարկում է Երեւանում ստեղծել արտակարգ լիազօրութիւններով օժտուած պետական ու կրօնական կենտրոնական շտապ, պետական ու եկեղեցական ներկայացուցիչների մասնակցութեամբ, որը կը համակարգի արտաքին ու ներքին բոլոր աշխատանքները ի խնդիր Հայկական Երուսաղէմի, Հայոց պատրիարքութեան պաշտպանութեան, իր աշխատանքները համակարգելով առաջին հերթին Հայոց պատրիարքութեան, հայկական միւս դաւանանքների ղեկավարութիւններին, ինչպէս նաեւ քրիստոնէական բոլոր եկեղեցիների ու կենտրոնների, աշխարհի գլխաւոր մայրաքաղաքների հետ:
Կենտրոնական Վարչութիւն
Երեւան, 12 Դեկտեմբեր 2017 թ.
