4 Նոյեմբեր 2022:
Առաւօտեան ժամը 10:30:
Արտասովոր եռուզեռ մը կը տիրէր Թէքէեան Մշակ. Միութեան սրահներուն մէջ: Տիկնանց յանձնախումբի անդամներ, մեղուներու նման՝ աշխոյժ, արագ ու կանոնաւոր, պէտք է տային իրենց վերջին ջանքերը, կատարելիութեան հասցնելու օրուան հանդիսութիւնը… որովհետեւ ժամը 11:00-ին բացումը պիտի կատարուէր՝ վաճառքին:
Մի քանի շաբաթներու, հսկայական աշխատանքի պտուղն էր որ պիտի քաղէին այդ տիկինները, որոնց գլուխն անցած էր, ինչպէս տարինե՜ր, միութեան ժրաջան վարչական Անի Թորիկեանը:
… Յետ օրհնութեան, պրն. Սամուէլ Քէօշկէրեանի տէրունական աղօթքին ու յաջողութեան սրտագին մաղթանքներուն, բացումի ու ժապաւէնի հատումի հանդիսաւոր արարողութիւնը կատարեց՝ արժանավայել համեստութեամբ, հանդիսութեան նախագահուհի՝ Տիկ. Մարիա Ճէռահեանը:
Գեղեցկօրէն ներկայացուած այլազան քաղցրեղէններու ու կարկանդակներու անդիմադրելի մատուցումը, կեդրոնական ուշադրութեան առարկայ կը դառնար բոլոր ներկաներուն, մինչ համեղ ճաշերու բոյրը աւելի կը սրէր բոլորին ախորժը:
Շատ մը վաճառորդներ, արդէն Ծննդեան ու Կաղանդի վերաբերեալ ապրանքներով կը պատրաստէին մօտալուտ տօնական օրերու բարձր տրամադրութիւնը:
Հուսկ ուրեմն վիճակահանութեան տասնեակ մը նուէրներ եկան խանդավառութիւնը իր զէնիթին հասցնելու:
… Վերջապէս… երբ զոհողութեամբ լեցուն, հաւաքական աշխատանքի մը նպատակն է ստեղծել հաճելի մթնոլորտ մը, ու մանաւանդ առիթ տալ հասարակութեան, մոռնալու առօրեայ միօրինակութիւնները, մի’շտ յաջողութեամբ կը պսակուի:
ՆԵՐԿԱՅ ՄԸ
