Նոյեմբեր 21-ի յետմիջօրէին, Պոլսոյ պատրիարքարանին մէջ գումարուեցաւ Եկեղեցական համագումար ժողով մը: Տեղապահ Գարեգին արք. Պէքճեանի նախագահութեամբ՝ Գումգաբուի մէջ համախմբուեցան պատրիարքական աթոռի ենթակայ հոգեւոր հայրերը: Այս մասին կը հաղորդէ Պոլսոյ «Ժամանկ» օրաթերթը։
Մօտաւոր անցեալին, Կրօնական ժողովի նիստին ընթացքին որոշուած էր կազմակերպել Եկեղեցական համագումարի նիստ: Անոր նպատակն էր համալրել Կրօնական ժողովի կազմէն պակսած անդամները:
Համագումարի սկիզբը տեղապահ սրբազան հայրը հանդէս եկաւ բացման խօսքով: Կրօնական ժողովի ատենապետ Սահակ եպս. Մաշալեան անդրադարձաւ համագումարի նպատակին: Նորին սրբազնութիւնը մատնանշեց, որ Միւռոն Ա. քհնյ. Այվազեան ներկայիս անկողինին կը ծառայէ, իսկ Եղիա Ա. քհնյ. Քերվանճեան հաստատուած է արտասահման: Հետեւաբար, անհրաժեշտութիւն յառաջացած է Կրօնական ժողովին շարքերը լրացնել:
Բաց քուէարկութեամբ կազմուեցաւ ժողովի դիւանը: Եղիշէ վրդ. Ուչքունեան ընտրուեցաւ ատենապետ, իսկ Տրդատ քհնյ. Ուզունեան՝ ատենադպիր: Զաքէոս Ծ. վրդ. Օհանեան եւ Թաթուլ Ծ. վրդ. Անուշեան եղան քուէախոյզներ: Փակ քուէարկութեան արդիւնքով՝ Կրօնական ժողովի անդամ ընտրուեցան Զատիկ վրդ. Պապիկեան եւ Կորիւն Ա. քհնյ. Ֆէնէրճեան: Արդիւնքի հրապարակումէն ետք, նորընտիր տէր հայրը հանդէս եկաւ սրտի խօսքով մը:
Համագումարը աւարտին հասաւ տեղապահ սրբազան հօր աղօթքով:
