Ն.Ս.Օ.Տ.Տ. ԳԱՐԵԳԻՆ Բ. ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՕՍՔԸ
ԱՄՆ ՀԱՅՈՑ ԱՐԵՒՄՏԵԱԱՆ ԹԵՄԻ 90-ԱՄԵԱԿԻ ԱՌԻԹՈՎ ՀՐԱՒԻՐՈՒԱԾ ՊԱՇՏՕՆԱԿԱՆ ՃԱՇԿԵՐՈՅԹԻՆ
(Պըրպենք, Հոկտեմբեր 29, կիրակի, 2017 թ.)
«Միասնականութեամբ պիտի կարողանանք յաղթահարել նաեւ եկեղեցական պառակտումը եւ հակականոնական ընթացքները, որ առկայ են եւ այստեղ՝ Ամերիկայի Միացեալ Նահանգների եւ Գանատայի Հայոց թեմերում: Երբ եկեղեցական կեանքը պառակտուած է, չի կարող կերտուել միութիւնը ազգային կեանքի: Լիայոյս ենք, որ մեր հոգեւոր եղբօր՝ Արամ Ա. Կաթողիկոսի հետ պիտի կարողանանք յաղթահարել այս կացութիւնը եւ նոր էջ բացել մեր Սուրբ Եկեղեցու նորագոյն պատմութեան մէջ:»
Գերաշնորհ Տ. Յովնան արքեպիսկոպոս Տէրտէրեան առաջնորդ ԱՄՆ Հայոց Արեւմտեան թեմի,
Մեծարգոյ քաղաքապետ Էրիք Գարսէտի, ՀՀ հիւպատոս Գրիգոր Յովհաննսիեան,
Գերաշնորհ Խաժակ Սրբազան, առաջնորդ ԱՄՆ Հայոց Արեւելեան թեմի,
Տէր եւ Տիկին Վաչէ եւ Թամար Մանուկեան, Սինան եւ Անժէլ Սինանեան, Ժոզէֆ եւ Կարինէ Կանիմեան, Ժիրայր եւ Փաթրիսիա Թրփանճեան, Պետրոս եւ Կարինէ Տաղլեան, Պետրոս եւ Աննա Օրունչաքչիէլ, Անդրանիկ եւ Վերժինիա Զորայեան, Արմէն եւ Նորա Համբար, Զաւէն եւ Սօնա Ակեան, Ռէյ եւ Անի Յարթունեան, Տիար Ճոն Թաջիրեան,
Սիրելի ներկաներ,
Այսօր արժեւորում ենք Ամերիկայի հիւրընկալ հողում ապաստան գտած մեր ժողովրդի անցած ուղին, որը հաւատքի, յոյսի, լաւատեսութեան ու վերելքի ուղի է: Ձեր հայրերը գաղթական եւ հայրենազուրկ հաստատուեցին Ամերիկայում: Ցաւ ու վշտի մէջ, անորոշութեան առջեւ, դժուարութիւններ ու նեղութիւններ յաղթահարելով՝ նրանք կերտեցին իրենց եւ իրենց զաւակների ապահովութիւնն ու բարօրութիւնը եւ դրեցին հիմերը եկեղեցական ու ազգային կեանքի՝ Հայրենիքի եւ Սուրբ Էջմիածնի սէրը իրենց սրտում:
Մեր ժողովրդի զաւակները նշանակալի յաջողութիւններ ունեցան եւ իրենց գնահատելի ներդրումը բերեցին այս մեծ եւ հզօր երկրի գիտութեան, մշակոյթի, արուեստի, արդիւնաբերութեան եւ այլ բնագաւառներում: Շատերի անուններն այսօր էլ քաջածանօթ են Ամերիկայում եւ նրա սահմաններից դուրս: Ուիլիըմ Սարոյեան, Արշիլ Գորկի, Ալեք Մանուկեան, Ռուբէն Մամուլեան, Լեւոն-Զաւէն Սուրմէլեան, Վարազդատ Գազանճեան, Ասատուր Սարաֆեան, Քըրք Քըրքորեան եւ ուրիշներ իրենց փառքի կնիքը դրեցին մեծ ու հզօր այս երկրի պատմութեան մէջ՝ յաւելելով պատիւ մեր ժողովրդի բարի անուանը: Այսօր էլ բազմաթիւ հայորդիներ յայտնի անձեր են եւ շարունակում են իրենց նպաստը բերել Միացեալ Նահանգների առաջընթացին, ինչպէս եւ՝ ամերիկահայ համայնքի շինութեանն ու պայծառութեանը: Թեմի ինը տասնամեակների ձեռքբերումները վկայութիւնն են ձեր հայրերի եւ ձեր անդուլ ջանքերի, եկեղեցասիրութեան, ազգային-եկեղեցական կեանքի հանդէպ նախանձախնդրութեան ու նուիրումի: Մենք հպարտ ենք, սիրելիներ, որ դուք ձեր բարեպաշտ, ստեղծարար կեանքով, իբրեւ Միացեալ Նահանգների արժանաւոր քաղաքացիներ, վայելում էք յարգանքն ու վստահութիւնը իշխանութիւնների եւ նրանց բարեացակամ աջակցութիւնը ազգային-եկեղեցական կեանքի առաջընթացին ուղղուած ձեր ձեռնարկներին:
Այսօր մեր ժողովրդի առջեւ նոր հրամայկաններ ու տեսլականներ են կանգնած: Այլեւս իրականութիւն է հայրենի անկախ պետականութիւնը: Հայաստանում եւ ազատագրուած Արցախում մեր ժողովուրդը նոր կեանք է կառուցում: Հայրենիքի զօրացումը նաեւ Սփիւռքի զօրացումն է եւ առյաւատչեան մեր ժողովրդի ապագայի ու ազգային իղձերի իրագործման: Նուիրական մեր Հայրենիքը, որի տեսիլքով դարեր շարունակ աշխարհի տարբեր կողմերում բաբախել է հայոց կեանքը, կարիքն ունի իր զաւակների աջակցութեան: Գիտէք, որ Հայաստանն ու Արցախը շարունակում են մնալ շրջափակման մէջ, նաեւ՝ սահմանների եւ սահմանամերձ բնակավայրերի պաշտպանութեան հրամայականի առջեւ:
Առկայ են տնտեսական խնդիրներ, սոցիալական մարտահրաւէրներ, արտագաղթ, որոնց յաղթահարումը հրատապ է հայրենի մեր երկրի առաջընթացն ու բարօրութիւնը ապահովելու համար: Հայրենական կեանքում թերութիւնները, բացթողումները պատճառ չեն կարող լինել, որ երես դարձնենք Հայրենիքից: Այստեղ ձեր շարքերում նստած են բարերարներ, ովքեր մշտական զօրակցութիւն են բերում Հայաստանին ու Արցախին: Հայրենակերտումի գործում դեռ մեծ ճանապարհ պիտի անցնենք: Այսօր առաւել ջանքեր ու յանձնառութիւններ են անհրաժեշտ, որպէսզի զարգացող ու հզօր դարձնենք մեր երկիրը եւ բարօր կեանք ապահովենք Հայրենիքում: Հրատապ է հզօրացումը, վերազինումը մեր բանակի, որ դիմագրաւում է չդադարող սադրանքների ու յարձակումների, յաճախ նաեւ երիտասարդ հայորդիների կեանքերի գնով պաշտպանելով խաղաղութիւնը Հայաստանում եւ Արցախում:
Այսօր Հայրենիքի, մեր ողջ ազգային, պետական, հոգեւոր-եկեղեցական կեանքի վերելքի ուղին այսօր մեզ համար պատգամ է, հրաւէր՝ համազգային միասնութեամբ յաղթանակի առաջնորդելու Արցախի արդար իրաւունքի ճանաչումը, մեր արդար դատը, որը մեր ժողովրդի իւրաքանչիւր զաւակի համար նուիրական նպատակ է: Միասնականութեամբ պիտի կարողանանք յաղթահարել նաեւ եկեղեցական պառակտումը եւ հակականոնական ընթացքները, որ առկայ են եւ այստեղ՝ Ամերիկայի Միացեալ Նահանգների եւ Գանատայի Հայոց թեմերում: Երբ եկեղեցական կեանքը պառակտուած է, չի կարող կերտուել միութիւնը ազգային կեանքի: Լիայոյս ենք, որ մեր հոգեւոր եղբօր՝ Արամ Ա. Կաթողիկոսի հետ պիտի կարողանանք յաղթահարել այս կացութիւնը եւ նոր էջ բացել մեր Սուրբ Եկեղեցու նորագոյն պատմութեան մէջ:
Սիրելիներ, հասել ենք այն բարի օրուան, երբ մեր հոգու հաւատքն ու հայրենասիրութիւնը այսօր մեզ ուժ պիտի դառնան ոչ թէ մաքառելու եւ գոյատեւելու համար, այլ հաստատուն քայլերով վերելքի ուղիով ընթանալու: Յայտնի խօսքն ասում է՝ Աստուած օգնում է նրանց, ովքեր իրենք են իրենց օգնում: Ժամանակը մեր ձեռքին է, բայց այն չի սպասում: Արդ , իրագործենք, ինչ պարտաւոր ենք: Գնահատանքով այսօր կուզենայինք անդրադառնալ նաեւ, որ ամերիկահայութեան կարեւոր զօրակցութեամբ են Մեր գահակալութեան ընթացքում արդիւնաւորուել Մայր Աթոռի ծրագրերը եւ առաքելութիւնը հաւատաւոր մեր ժողովրդի կեանքում: Մենք կրկին մեր բարձր գնահատանքն ու բարեմաղթանքներն ենք բերում Հ.Բ.Ը. Միութեան բարեջան անդամներին՝ ի գլուխ Միութեան նախագահ՝ տիար Պերճ Սեդրակեանի: Աղօթում ենք նախկին Նախագահ տիկին Լուիզ Մանուկեան Սիմոնի կենաց արեւշատութեան, այստեղ ներկայ, այս սեղանի շուրջ բազմած Սուրբ Էջմիածնի բարերարների` Տեր եւ Տիկին Վաչէ եւ Թամար Մանուկեանների, Տէր եւ Տիկին Ժիրայր եւ Փաթրիսիա Թրփանճեանների, Տէր եւ Տիկին Պետրոս եւ Աննա Օրունչաքչիէլների, Տեր եւ Տիկին Անդրանիկ եւ Վերժինիա Զորայեանների, Տեր եւ Տիկին Զաւէն եւ Սօնա Ակեանների, Տէր եւ Տիկին Արմէն եւ Նորա Համբարի, մեր ժողովրդի բոլոր այն զաւակներին համար, ովքեր իրենց վաստակից բաժին են հանում յանուն եկեղեցաշէն եւ ազգօգուտ իրագործումների, նաեւ բոլոր նրանց համար, ովքեր համախումբ մեր Սուրբ Եկեղեցու շուրջ՝ իրենց ջանքերն են ներդնում, իրենց ժամանակը, կարողութիւնները եւ փորձառութիւնը ծառայեցնում նրա սրբազան առաքելութեանը:
Մենք մխիթարուած ու քաջալեր ենք տեսնելով ԱՄՆ Հայոց Արեւմտեան թեմի առաջընթացն ու զօրացումը, որի համար հայրական մեր սէրն ու գնահատանքն ենք բերում թեմակալ առաջնորդ Յովնան Սրբազանին, նախկին առաջնորդ Վաչէ արքեպիսկոպոս Յովսէփեանին, թեմի ողջ հոգեւոր դասին, թեմական խորհրդին` ատենապետութեան Տիար Յովսէփ Կանիմեանի, եւ հաւատաւոր Մեր բոլոր զաւակներին: Հանգիստ ենք, քանզի գիտենք, որ Յովնան Սրբազանը միշտ անհանգիստ է եւ իր նորանոր նախաձեռնութիւններով աշխոյժ է պահում համայնքային կեանքը` հաւատաւոր մեր զաւակներին կապելով Եկեղեցու, հայութեան եւ Հայրենիքի հետ: Մեր յորդորն ենք բերում ձեզ, սիրելիներ, որ նախանձախնդրութեամբ շարունակէք մասնակցութիւն ունենալ մեր Սուրբ Եկեղեցու առաքելութեան արգասաւորմանը, Հայրենիքին զօրակցելուն, արդիւնաւորէք նոր սերնդի հայեցի դաստիարակութիւնը եւ ազգանուէր նախաձեռնութիւնները՝ յանուն ազգային-եկեղեցական մեր անդաստանի շէնացման:
Հայրապետիս համար մեծ գոհունակութիւն է այսօր լինել ձեզ հետ այստեղ` Ամերիկայում եւ կիսել ձեր ուրախութիւնը ԱՄՆ Հայոց Արեւմտեան թեմի հաստատման 90-ամեակի տօնախմբութիւնների առիթով: ԱՄՆ Հայոց Արեւմտեան թեմի 90-ամեակի տօնախմբութեան եւ արժեւորման այս ուրախալի օրը Մեր մաղթանքն է, որ Ամենախնամ Տէրը Իր Սուրբ Աջի հովանու ներքոյ պահպանի ձեզ ամէնքիդ, պարգեւի քաջառողջութիւն եւ արդիւնազարդի ձեր նուիրումն ու ջանքերը ի պայծառութիւն Առաքելական մեր Սուրբ Եկեղեցու: Մեր գնահատանքն ենք բերում թեմակալ առաջնորդի գլխաւորութեամբ, թեմական խորհրդին, յանձնախմբերին, տիկնանց միութիւններին, եւ բոլոր այն անձանց, ովքեր իրենց ազնիւ ու գովելի ջանքերը բերեցին հովուապետական մեր այցելութեան պատշաճ կազմակերպման գործում: Սիրելիներ, այս հանդիսաւոր ճաշկերոյթին քաղցր պարտականութիւն ունենք գնահատանքի արժանացնելու բարերարներ Տէր եւ Տիկին Ժիրայր եւ Փաթրիսիա Թրփանճեաններին: Նրանց ազնիւ աջակցութեամբ է Հառիճի պատմական վանքում գործում հոգեւոր դպրանոցը, որի սաների գեղեցիկ կատարումները վայելեցիք այս երեկոյի ընթացքում: «Թրփանճեան հիմնադրամի» միջոցով աջակցութիւն է ցուցաբերւում Հայաստանի եւ Արցախի գիւղական, յատկապէս՝ սահմանամերձ բնակավայրերի զարգացման, կրթական ու մշակութային ծրագրերին՝ բոլոր այլ բարեգործութիւններով հանդերձ յաւերժացնելով Թրփանճեան բարեպաշտ գերդաստանի անունը մեր Սուրբ Եկեղեցու երախտաւոր բարերարների շարքում: Բարձրօրէն գնահատելով Թրփանճեան ընտանիքի մեծ վաստակը ազգային-եկեղեցական մեր անդաստանում, ուրախ եւ գոհունակ սրտով Տիար Ժիրայր Թրփանճեանին շնորհում ենք «Ասպետ Սուրբ Էջմիածնի» հայրապետական բարձր շքանշանանը:
Մեր Տեր Յիսուս Քրիստոսի սէրը, շնորհները եւ օրհնութիւնները թող լինեն ձեզ բոլորիդ հետ. ամեն:
