Սիրելի բարեպաշտ ժողովուրդ,
Մեր երկրի ու ժողովրդի ներքին կեանքը վերջին օրերին ուղեկցւում է բուռն ու լարուած իրադարձութիւններով՝ կապուած Հայաստանի Հանրապետութեան վարչապետի ընտրութեան հետ:
Մեր մտահոգութիւնն ենք յայտնում ստեղծուած իրավիճակի առնչութեամբ, որ խաթարում է հանրային բնականոն կեանքի ընթացքը։ Իւրաքանչիւր հայորդի հայրենիքի հանդէպ սիրուց մղուած ունի իր տեսլականը, որի վերաբերեալ իր մօտեցումներն ու ընկալումները կարող է արտայայտել օրինական միջոցներով՝ ազատօրէն իրացնելով իր քաղաքացիական իրաւունքները: Սակայն դա երբեք չի ենթադրում սիրոյ եւ ողջամտութեան նահանջ, այլոց իրաւունքների ոտնահարում, առաւել եւս՝ մարդկանց կեանքի վտանգում: Մեր ժողովրդի եւ մեր Սուրբ Եկեղեցու զաւակներն են եւ՛ ցուցարարների, եւ՛ իրաւապահների շարքերում: Անընդունելի եւ անթոյլատրելի են ատելութեան եւ թշնամանքի հրահրումը եւ որեւէ տեսակի ընդհարում ու բռնութեան գործադրում:
Յորդոր ենք ուղղում Մեր ժողովրդի զաւակներին` կոչ անելով պահպանելու զգաստութիւնն ու ողջախոհութիւնը, հայրենասիրութեան մէջ օրինայարգութիւնը եւ խաղաղութեան նախանձախնդրութիւնը՝ ցուցաբերելով միմեանց հանդէպ յարգանք եւ ներողամտութիւն: Հայրենիքի առջեւ ծառացած մարտահրաւէրները յաղթահարելի են սոսկ, երբ առկայ է համերաշխութիւն, փոխհասկացողութիւն, համընդհանուր պատասխանատուութիւն եւ միասնութիւն: Մեր երկիրն այսօր պահանջն ունի այս ոգու դրսեւորման:
Աղօթք ենք բարձրացնում առ Աստուած`հայցելով Տիրոջ իմաստութիւնը եւ Սուրբ Հոգու առաջնորդութիւնը մեզ ամէնքիս:
«Միաբա՛ն եղէք, խաղաղութի՛ւն արէք. եւ խաղաղութեան ու սիրոյ Աստուածը թող լինի ձեզ հետ» (Բ Կորնթ. 13.11):
