21 Յունիս 2021-ի թիւով մանրամասնօրէն անդրադարձած էինք Թէքէեան Մշակութային Միութեան նախաձեռնութեան, ուր բերձորցի փախստականներուն՝ եկամտաբեր միջոցառումներ ապահովելով, անոնք կը շարունակեն ապրիլ Հայաստանի մէջ: Ստորեւ կը հրատարակենք այդ տպաւորութիւնները եւ շնորհակալական սրտի խօսքերն ու զգացումները որ ստացած ենք բերձորցի մանուկներէն:
Բարեգործութիւնը կենսակերպ է…
Իմ մանկութեան վառ յիշողութիւններից է մեղր քամելու արարողութիւնը, երբ ամբողջ ընտանիքս խառնւում էր իրար։ Այդ ամէնը մինչ պատերազմն էր, իսկ չարաբաստիկ պատերազմը մեզ զրկեց այդ հաճելի պահերը վայելելու հնարաւորութիւնից։
Պատերազմից յետոյ մեր կեանքում յայտնուեցին բարի մարդիկ, ովքեր օգնութեան ձեռք մեկնեցին մեզ, իրենց բարի գործերով փորձեցին թեթեւացնել մղձաուանջի վերածուած մեր կեանքը: Գանատայի Թէքէեան Մշակութային Միութեան վարչութեան անդամ՝ Արթօ Մանուկեանը, ում համար բարեգործութիւնը կենսակերպ է, Վայոց ձորի մի քանի ընտանիքների, այդ թւում նաեւ մեր ընտանիքին տրամադրուեց հինգ մեղուաընտանիք։ Մեղուաընտանիքներին տեղաւորեցինք պապիկիս հայրական տուն` Վայոց Ձորի մարզի Հեր֊հեր գիւղ։ Ճիշդ է, ես շատ եմ վախենում մեղուների խայթոցից, բայց սիրով ու հետաքրքրութեամբ եմ հետեւում մեղուների աշխատանքին։
Ինձ դուր է գալիս նրանց աշխատասիրութիւնը, ընկերասիրութիւնը, միմիանց հետ հաղորդակցուելու կարողութիւնը, աշխատանքի բաժանումը եւ ամենակարեւորը, աշխատանքի արդիւնքում ստեղծուած բարիքը՝ մեղրը: Անգամ հասցրել ենք վայելել նրանց տուած առաջին բարիքը, ու հիւրասիրել նաեւ հարեւաններին, որի անմահական համի մասին դեռ պատմելու եմ։
Օգտուելով առիթից, ուզում եմ շնորհակալութիւնս յայտնել բոլոր այն մարդկանց, ովքեր կազմակերպեցին, իրագործեցին, տրամադրեցին ու ինձ վերադարձրին իմ մանկութեան յիշողութիւնները հարազատ Բերձորիս մասին։
Յուսամ ծրագիրը շարունակական կը լինի եւ իմ ընկերներից շատերը նոյնպէս կը կարողանան օգտուել բարին արարող, բարին ստեղծող մարդկանց աջակցութիւնից։
Շնորհակալութիւն Ձեզ Յարգարժան Արթօ Մանուկեան մեր կողքին գտնուելու համար: Իհարկէ սա առաջին անգամ չէր, դպրոցս օր օրի գեղեցկանում էր Ձեր եւ միւս բարերարների օգնութեամբ, սակայն չարաբաստիկ պատերազմը կիսատ թողեց մեր երեզանքները:
Սիւզաննա Ղամբարեան VII դասարան ք. Ջերմուկ, Բերձորի Վահան Թէքէեանի անուան դպրոցի սան:
******************************************************************
Ես ՝ Ռաֆֆիկ Ալէքսանեանս, ծնուել եւ մեծացել եմ ԱՀ Բերձոր քաղաքում։ Կրթութիւն եմ ստացել Վահան Թէքէեանի անուան դպրոցում, որը վերջին տարիներին բարեկարգուել էր Թէքէեան Միութեան կողմից։ Չարաբաստիկ պատերազմից յետոյ տեղափոխուել ենք Վայոց Ձորի մարզ, գիւղ Մալիշկա։ Ամերիկայի եւ Գանատայի Թէքէեան Մշակույթային Միութիւնը, Արցախից տեղահանուած մի շարք ընտանիքների իր օգնութեան ձեռքն է մեկնել։ Ես իմ խորհին շնորհակալութիւնն եմ յայտնում միութեան բոլոր կազմակերպիչներին, այս դժուար պահին ինձ եւ իմ ընտանիքին՝ երկու գլուխ խոշոր եղջերաւոր անասուն նուիրելու համար։ Աստուած օրհնի Ձեզ, եւ թող ազգս երբեւէ պատերազմ չը տեսնի։
ՇՆՈՐՀԱԿԱԼՈՒԹԻՒՆ
****************************************************************
