Կիրակի՝ 7 Ապրիլ 2024-ի կէսօրէ ետք ժամը 2:00-ին, տեղի ունեցաւ Ս. Գրիգոր Լուսաւորիչ Առաջնորդանիստ Մայր Եկեղեցւոյ տարեկան ընդհ. անդամական ժողովը 2023 տարեշրջանի:
Անդամներու արձանագրութիւններէն ետք, ժողովի բացման կոչը ի պաշտօնէ կատարեց նախորդ տարուան տարեկան ընդհանուր ժողովի դիւան ատենապետ դոկտ. Արշաւիր Կէօնճեան, եւ նկատի ունենալով ներկայ անդամներուն թիւը աւելի էր քան պահանջուած 50-ը, ժողովը համարուեցաւ օրինական:
Տարեկան ընդհանուր ժողովի նախագահ՝ Գանատահայ Թեմի Առաջնորդ՝ Գերշ. Տ. Աբգար Եպս. Յովակիմեանի Տէրունական աղօթքէն ու իր օրհնութիւնը տալէ ետք ժողովը բացուած յայտարարուեցաւ:
Ժողովը անցաւ սահուն, կանոնաւոր ու անսայթաք:
Ա) Օրուայ դիւանի ընտրութիւնը կատարուեցաւ միաձայնութեամբ. դոկտ. Արշաւիր Կէօնճեան՝ ատենապետ եւ Շուշան Արիսեան՝ ատենադպրուհի:
Բ) Դոկտ. Արշաւիր Կէօնճեան առաջարկեց նախորդ անդամական ժողովի ատենագրութեան ընթերցումը զանց առնել, քանի՝ համացանցի միջոցաւ նախապէս ուղարկուած էր անդամներուն:
Գ) Դոկտ. Արշաւիր Կէօնճեան յաջորդաբար հրաւիրեց յանձնախումբերու ներկայացուցիչները, իրենց տեղեկագիրները ներկայացնելու համար:
Դ) Առաջին հերթին Տէր Կոմիտաս Քհնյ. Միրզախանեան ներկայացուց հոգեւոր հովիւի տեղեկագիրը: Ան նախ՝ շնորհաւորեց Առաջնորդ Սրբազան Հօր իր խաղաղ ու իմաստուն աշխատանքին, ողջունեց օրուան դիւանի ատենապետ՝ դոկտ. Արշաւիր Կէօնճեանը, ծխական խորհուրդի անդամներն ու պատգամաւորները:
Սրբազան Հայրը ջատագովեց տէր հօր կատարած աշխատանքը, անդրադառնալով, որ Տէր Կոմիտաս ծանրաբեռնուած էր հովուութեամբ՝ Ս. Գրիգոր Լուսաւորիչ Մայր Տաճարի, յաւելեալ Լաւալի ծուխի:
Տէր Կոմիտաս կատարեց որոշակի անդրադարձումներ:
* Եկեղեցւոյ «Կանթեղ» շաբաթաթերթը կը շարունակէ կանոնաւորաբար հրատարակուիլ:
* «Կոմիտաս» դպրաց դասը եւ երգչախումբը կը շարունակէ իր առաքելութիւնը յաւելեալ մասնակցողներու թիւերով:
* Նոր տարեշրջանը 6-րդ տարին ըլլալով կը շարունակէ հրատարակել Մայր Տաճարի երկլեզու օրացոյցը:
* Ամէն Կիրակի պատարագի աւարտին տիկնանց յանձնախումբին կողմէ տեղի կունենայ պատուասիրութիւն:
Ե) Ծխական Խորհուրդը ներկայացուց իր տեղեկագիրը:
Զ) Յիշուեցաւ, որ 38-րդ պատգամաւորական ժողովը տեղի պիտի ունենայ Մայիս ամսոյն, Լաւալ Ս. Խաչ եկեղեցւոյ մէջ:
Է) Ծխական Խորհուրդի հաշուապահ տիկ. Ռաքէլ Տողրամաճեան այս տարի ներկայ ըլլալով, ինք անձամբ ներկայացուց 31Դեկտ. 2023-ին աւարտող տարուայ ընթացքին գրանցուած գործարքները:
Երէցներուն տարեկան անդամակցութեան գումարը: 40 տոլար տարիներէ ի վեր նոյնը մնացած էր. պրն. Հրայր Ճիհանեան առաջարկեց աւելցնել այդ գումարը 50 տոլարի:
Ը) 2024- տարեշրջանի ներկայացուած նախահաշիւը գնահատանքով ընդունուեցաւ եւ վաւերացուեցաւ:
Թ) Սրբազան Հայրը գնահատանքով արտայայտուեցաւ «Մաս»ի յանձնախումբի բծախնդիր աշխատանքին:
Ժ) Իբրեւ ամփոփում՝ հետեւեալ անունները իրենց սիրայօժար պատասխանատուութիւնները կը ստանձնեն՝ նոր տարեշրջանի աշխատանքին
Ծխական Խորհուրդի անդամներ՝
Ատրինէ Աղազարեան- Ռաքէլ Տողրամաճեան- Արէթ Սոնմէզ- Էտի Հիւսէնճեան- Ալին Իրատեան- Շուշան Արոյեան- Սիլվա Ամատունի- Ռոպէրթ Քէշայեան- Մագտա Զաքարեան-Անդրանիկ Շիրինեան եւ Վարուժ Մարկոսեան:
Պատգամաւորներ՝
Մկրտիչ Գանոնճեան եւ Րիչըրտ Եղիայեան
Ընտրողական Յանձնախումբ՝
Ժիրայր Տոլար-Տօքթ. Հրայր Տէր-Գէորգեան-Սօնա Սուվալեան եւ Մուրատ Թագւորեան
Հաշուեքննիչ Յանձնախումբ՝
Ժիրայր Տէօվլէթեան- Կրէկ Տէր-Գէորգեան եւ Մարալ Պալեան
Հետաքրքրական էր երբ վերջաւորութեան, տիկ. Զուարթ Թագւորեան փափաքեցաւ խօսք առնել ու յուզումով այլ պատշաճ պոռթկումով արտայայտուեցաւ – աւելի ճի’շդը բողոքեց – այն անհատներուն մասին որոնք կը դառնանան այս Ս. Տաճարէն ու կը համարձակին հեռանալ: Ճիշդ է եւ մարդկա’յին, երբ որոշ տարակարծութիւններ կունենանք իրարու հանդէպ… սակայն այդ հարցերը անձնականի վերածելով հեռանալ եկեղեցիէն… իրապէ’ս անհասկնալի է:
Ժողովին անդամները դիմաւորեցին այս խօսքերը՝ ջերմ ծափողջոյններով:
Գերշ. Տէր Աբգար Եպս. Յովակիմեանի աղօթքով եւ օրհնութեամբ փակուեցաւ Ս. Գրիգոր Լուսաւորիչ Առաջնորդանիստ Մայր Տաճարի ընդհ. անդամական ժողովը (2023-ի տարեշրջանի):
ԹՂԹԱԿԻՑ
